لايت كوميدي

وبعد حوالي 3 سنين زواج أخيررررررررررررررررراً الزوجة حامل..هنشوف تلقت الخبر إزاي من الدكتورة...

الزوجة أسمها: لارا

في العيادة:

الدكتورة: هو أحنا طبعاً مش هنقدر نعرف نوعه دلوقتي خالص...بس قريب هنكون عرفنا...متقلقيش.

لارا: آه طبعاً أكيد أكيد أمال إيه..أنا أصلاً مش مستعجلة إني أعرف دلوقتي خالص كله بوقته حلو....."لحظات إندهاش" نوع مين يا دكتور أساساً؟!!!!

الدكتورة: الكائن اللي مش بيخلينا نعرف ننام لا صبح ولا ليل..

لارا: الكائن اللي مش بيخلينا نعرف ننام مممممممم حنفية المطبخ لما تبقى عايزة يتركب لها جلدة.

الدكتورة: حنفية المطبخ وجلدة!!! لأ خالص أنا قصدي حاجة تانية.

لارا: ممممممممم تبقى الماسورة لما تضرب وعايزة تتصلح..دي بتفضل طول الليل تنقط ومبنعرفش ننام منها..

الدكتورة: ماسورة!! إيه جو أفلام نادية الجندي ده اللي إنتِ عايشة فيه...لأ برضه أنا قصدي حاجة تانية ركزي شوية.

لارا: بسسسسسسسس عرفتها الناموس..الله يخربيته مفيش حاجة مأثرة فيه لا ريد ولا غيره...والله يا دكتورة ده بيفضل ياكل في جتتي طول النهار والليل وكأني غنيمة بالنسبة له.

الدكتورة: توب علينا يا رب من دي شغلانة...ودول عيانين هبل..يا رب أنا أصلاً كنت عايزة أدخل تجارة..أنا إيه اللي رماني الرمية دي بس...

لارا: مالك يا دكتورة بتندبي حظك ليه بس...فضفضيلي يا حبيبتي ومتقلقيش من حاجة أنا هعرف افهمك كويس...ده كل الناس بتقول عليا اني ذكية وبفهمها وهي طايرة...قوليلي انتي بس مالك ياختي..

الدكتورة: "فقدت النطق"

لارا: يا دكتورة يا دكتورة مالك بس..في إيه..

الدكتورة: لاراااااااااااااااا انتي حاااااااااااااااااامل ومن شهر كمان..

لارا: طب مأنا كنت فاهمة بس بستعبط عليكي من بدري.."لحظات تنحت فيها للدكتورة ردت وقالتلها": إيه !!! بتقولي إيه مين دي اللي حامل.

الدكتورة: لأ برا بقى إحنا مش ناقصين غباوة..."تحاول الدكتورة دفعها خارجاً"

لارا: الله يبارك لك استني بس..الله يسترك ويخلي لك ولادك يا رب..

الدكتورة: أنا مش متجوزة أصلاً..

لارا: مش موضوعنا وعموماً هنبقى نشوف لك عريس..بس بجد اللي انتي قولتيه ده حقيقي؟!!

الدكتورة: وهو أنا قولت ايه؟!!

لارا: لا والنبي مش وقت غباء مش هيبقى انتي وأنا..أنا بجد حامل؟

الدكتورة: أيوة يا ستي..

لارا: هييييييييييييييييييييييييييييييييييييييييييييييييييييييييييييييييه وعمالة تتنطط وتلعب في سماعة الدكتورة بشكل مُضحك...ومسكت الروشتات وعمالة تقطع فيها وترميهم في الهواااا....راحت راقصة أي رقص عشوائي مُضحك....مسكت الدكتورة وفضلت تلف بيها....إلى أن سابتها فجأة فالدكتورة اترمت على سن المكتب واتخبطت فيه...ولارا مخدتش بالها خالص منها...فتحت باب العيادة وهي مش باصة للدكتورة وقالتلها سلام يا دكتورة ربنا يطول لنا في عمرك يا رب..بتكلمها وهي مش واخدة بالها أن خبطتها موتتها أساساً...